Потпечен карфиол во бешамел сос

Кога го начекав рецептов, помислив, супер идеја како кафриолот да не биде досаден. Долго време барав како да го спремам, а да не е блуткав/обарен, или жив/закиселен во салата. И денес се случи овој супер брз и вкусен ручек од рерна :)

Состојки:

1 средна главица карфиол

150 грама шунка, врат, сланина, пршута (може и без ова)

За бешамелот:

450 мл млеко

20 гр. путер

малку зејтин

2 супени лаж. брашно (средно полни)

мускатен орев, сол, бибер

200 гр. рендан кашкавал

За крцкавата кора:

2 супени лажици презла

1 супена лажица пармезан

Во зовриена вода во која може да ставите една коцка за супа, сув зачин или само сол/бибер, го вариме карфиолот расцепкан на средни цветови, не повеќе од 7-8 мин. Во средно голема тава намачкана со малку путер го истураме исцедениот карфиол.

Следно, бешамелот. Парче путер и малку зејтин ставаме во тенџере и штом се стопи путерот ставаме две средно полни лажици брашно. Мешаме со маталка, и додаваме млеко на собна температура непрестано мешајќи. Ако е многу густо, разблажете со малку вода. Додаваме зачини, сол, бибер, мускатен орев. Бешамелот се вари неколку минути и го тргаме од оган, па го додаваме ренданиот кашкавал и веднаш прелеваме врз карфиолот. Врз ова, по желба ставаме некакво сувомеснато, и на крај презлата помешана со пармезанот.

Се пече околу 25 минути (да фати боја) во загреана рерна.